فیصل آباد: پنجاب کے شہر فیصل آباد میں داماد نے فائرنگ کرکے ساس اور سسر کو قتل کردیا۔
اے آر وائی نیوز کی رپورٹ کے مطابق فیصل آباد میں معمولی تلخ کلامی پر داماد نے فائرنگ کرکے ساس اور سسر کو قتل کردیا، شوہر کی فائرنگ کے دوران اس کی بیوی نے بھاگ کر اپنی جان بچائی۔
جاں بحق ہونے والے ساس اور سسر کی لاشوں کو ضابطے کی کارروائی کے لیے اسپتال منتقل کردیا گیا ہے۔
پولیس کے مطابق سمندری کے نواحی علاقے میں فیصل منیر اپنی ناراض بیوی کو منانے سسرال آیا تھا، ملزم نے بیوی کے ساتھ جانے پر رضا مند نہ ہونے پر فائرنگ کرکے سسر 50 سالہ نسیم اقبال اور 45 سالہ ساس انوری بی بی کو قتل کردیا۔
پولیس کا کہنا ہے کہ فائرنگ کے دوران ملزم کی بیوی نے بھاگ کرجان بچائی جبکہ ملزم واقعے کے بعد فرار ہونے میں کامیاب ہوگیا۔
پولیس نے مقتول کے بھائی افتخار علی کی مدعیت میں فیصل اور فہد منیر کے خلاف مقدمہ درج کرکے تحقیقات کا آغاز کردیا ہے، ملزم کی تلاش میں چھاپے مارے جارہے ہیں۔
واضح رہے کہ رواں سال ستمبر میں پنجاب کے شہر راولپنڈی میں دیور نے اپنے بھائیوں کے ساتھ مل کر بھابھی کے گھر میں گھس کر فائرنگ کردی جس کے نتیجے میں تین بہنیں اور بھائی جاں بحق ہوگئے تھے۔
پولیس کا کہنا تھا کہ زخمی خاتون ایرج نے اپنے ابتدائی بیان میں بتایا کہ فائرنگ اس کے دیور غلام عباس نے کی ہے، وہ خاتون کے طلاق لینے کے فیصلے کے خلاف تھا۔
