لاس اینجلس: امریکا کی مشہور گلوکارہ اور اداکارہ جینیفر لوپیز چہرے کی خوبصورتی کو مصنوعی قرار دینے پر سیخ پا ہوگئیں۔
امریکی اداکارہ نے نے دو روز قبل سماجی رابطے کی ویب سائٹ اور فوٹو ویڈیو شیئرنگ پلیٹ فارم انسٹاگرام پر اپنی ایک ویڈیو شیئر کی جس میں وہ دعویٰ کررہی تھیں کہ فیس ماسک کے استعمال کے بعد اُن کا چہرہ نکھر گیا۔
اس ویڈیو پر اداکارہ کے ایک مداح نے لکھا کہ ’کیا میں اس بات کا ذکر کرسکتا ہوں کہ جب آپ بات کر رہی ہوتی ہیں تو آپ کی پیشانی اور بھنوئیں ایک جگہ ٹھہر جاتی ہیں، جس کی وجہ سے چہرے کی جھریاں نظر آتی ہیں‘۔
مداح نے لکھا کہ ’بھنوئیں اور پیشانی ایک جگہ ساکت ہونے کا مطلب ہے کہ آپ نے لازمی طور پر بوٹوکس کروایا ہے اور یہ ایک سے زائد بار کرواچکی ہیں، لیکن میں کہوں گا کہ یہ سب اچھا ہے‘۔
مداح کے کہنے کا مطلب تھا کہ اداکارہ نے اپنے چہرے کی خوبصورتی کو مصنوعی طریقوں کے استعمال سے برقرار رکھا ہوا ہے۔
جینیفر نے جب یہ تبصرہ پڑھا تو وہ خوبصورتی کو مصنوعی کہنے پر سیخ پا ہوگئیں اور انہوں نے لکھا کہ ’میرے چہرے پر جھریاں نہیں ہیں اور انہیں آنے میں ابھی دس سال لگیں گے‘۔
گلوکارہ نے لکھا کہ ’میں ایمانداری سے یہ بات کہتی ہوں کہ ابھی تک اپنے چہرے پر ایک بھی جھری نہیں دیکھی، میں اس سے پہلے پچاس کروڑ بار بتا چکیں ہوں کہ میں نے کبھی خوبصورتی کے لیے انجکشن لگوایا اور نہ ہی کبھی سرجری کروائی‘۔
