بنگلورو: بھارتی ریاست کرناٹک میں نایاب نسل کے بلیک پینتھر (سیاہ چیتے) کی افسوسناک ہلاکت ہوئی ہے۔
انڈیا ٹائمز کی رپورٹ کے مطابق افسوسناک حادثہ ریاست کرناٹک کے ضلع اودو پی کے گاؤں باڈا میں پیش آیا، جہاں ٹرین کی پیٹریوں سے بلیک پینتھر کی لاش ملی ہے۔
ویسے تو چیتے کی ہلاکت کی کوئی حتمی وجہ سامنے نہیں آسکی مگر شہریوں کا خیال ہے کہ اُسے ٹرین ڈرائیور نے ہی کچلا ہے۔
علاقہ مکینوں کا کہنا ہے کہ نایاب نسل کا چیتا رات کے وقت خوراک کی تلاش کے لیے نکلا ہوگا، وہ منگل کی رات جب پٹری پر پہنچا ہوگا تو منگالا ایکسپریس (ٹرین) آگئی ہوگی، جس کی زد میں آکر وہ ہلاک ہوگیا ہوگا۔
View this post on Instagram
محکمہ جنگلات کے حکام نے کہا ہے کہ ہلاک ہونے والے چیتے کی عمر چار سے پانچ سال کے درمیان تھی، ممکن ہے کہ وہ پٹری سے دوسری طرف جارہا ہو اور اسی دوران ٹرین آگئی ہو۔
حکام نے کہا کہ ’ریل گاڑی رفتار کی وجہ سے رک نہ سکی اور یہی بات اُس کی موت کا باعث بھی بنی’۔ محکمہ جنگلات نے چیتے کی لاش کو پوسٹ مارٹم کے لیے جانوروں کے اسپتال منتقل کردیا۔
محکمہ جنگلات کے حکام نے بتایا کہ چیتے کے جسم پر زخم تھے جبکہ اُس کے منہ سے خون نکلا تھا جو زمین پر جما ہوا نظر آیا۔
A black panther roaming in the jungles of Kabini, India. pic.twitter.com/UT8zodvv0m
— Earth (@earth) July 4, 2020
بھارتی میڈیا رپورٹ کے مطابق ریاست کرناٹک میں شہریوں نے رات کے وقت بلیک پینتھرز کو گشت کرتے ہوئے دیکھا ہے۔ گزشتہ برس دن کے وقت نگرہولا کے جنگلات میں بھی بلیک پینتھر شہری کو نظر آیا تھا جس کی تصویر انٹرنیٹ پر وائرل ہوئی تھی۔
