کراچی / اسلام آباد: وزیراعظم عمران خان نے اراکین اسمبلی کے تحفظات دور کرتے ہوئے سندھ سے فیصل واؤڈا اور سیف اللہ ابڑو کے ناموں کی بطور سینیٹ امیدوار حتمی منظوری دے دی۔
نمائندہ اے آر وائی نیوز کے مطابق وزیراعظم کی زیرصدارت سندھ کے اراکین اسمبلی کا ویڈیو لنک پر اجلاس ہوا جس میں اراکین نے سینیٹ امیدواروں کے حوالے سے اپنے تحفظات کا اظہار کیا۔
ذرائع کے مطابق تحریک انصاف نے سینیٹ انتخابات کے لیے فیصل واؤڈا اور سیف اللہ ابڑو کے ناموں کو حتمی قرار دیا۔
اجلاس میں رکن اسمبلی علی جی جی نے وزیراعظم کو آگاہ کیا کہ سندھ حکومت نے ہم سے سیکیورٹی واپس لے لی ہے، اراکین اسمبلی نے وزیراعظم سے آئی جی سندھ کی تبدیلی کا مطالبہ بھی کیا۔
مزید پڑھیں: سینیٹ الیکشن: سندھ اسمبلی میں نمبر گیم کس کے حق میں؟
اراکین اسمبلی سے گفتگو کرتے ہوئے وزیراعظم کا کہنا تھا کہ ’بطور انسان غلطی ضرور ہوسکتی ہے مگر جان بوجھ کر غلط فیصلہ نہیں کروں گا، آپ لوگ یقین رکھیں ملک و قوم کے مفاد میں بہتر فیصلے کروں گا‘۔
وزیراعظم عمران خان کا کہنا تھا کہ ’آئندہ انتخابات میں سندھ سے اچھے امیدوار میدان میں لانے پر ابھی سے کام کررہے ہیں، سندھ کےلوگوں میں شعور سیاسی بڑھ رہا ہے،آئندہ الیکشن کےحوالےسے انتخابی مہم کی خود نگرانی کروں گا‘۔
واضح رہے کہ تحریک انصاف نے جنرل نشست پر رکن قومی اسمبلی اور وفاقی وزیر برائے آبی وسائل فیصل واؤڈا اور ٹیکنوکریٹ نشست پر سیف اللہ ابڑو کو ٹکٹ دینے کا فیصلہ کیا تھا جس پر اراکین اسمبلی سے تحفظات کا اظہار کیا تھا۔
