سمندر میں چلنے والے ہزاروں ٹن وزنی بحری جہاز ویسے تو ہمیشہ پانی کے اوپر تیرتے نظر آتے ہیں مگر یہ طوفان کے دوران تیز ہوا اور سمندری لہروں کا مقابلہ نہیں کرپاتے۔
برطانوی نشریاتی ادارے دی سن نے ناروے کے سمندر میں پھنسنے والے مال بردارجہاز کی ویڈیو انٹرنیٹ پر شیئر کی جس میں جہاز کو لہروں کے سامنے بے بس اور پانی میں ہچکولے کھاتے دیکھا جاسکتا ہے۔
رپورٹ کے مطابق سامان لے جانے والا یہ جہاز سمندر میں پھنس گیا تھا، جس کے بعد یہ بڑی بڑی لہروں کی نذر ہوگیا۔
جہاز جب سمندر میں پھنسا تو عملے نے کنٹرول روم سے رابطہ کر کے صورت حال سے آگاہ کیا اور بتایا کہ وہ بہت زیادہ خطرے میں ہیں۔
عملے کی کال موصول ہونے کے بعد ناروے کی بحری فوج کو ہدایت کی گئی کہ وہ جہاز میں موجود ملازمین کو کسی بھی صورت ریسکیو کریں۔ نیوی عملے نے طوفان میں پھنسے جہاز کے عملے کو ریسکیو کرنے کی ویڈیو بھی بنائی۔
Dramatic rescue operation as massive cargo ship is adrift on Norwegian sea pic.twitter.com/Iz4J04tkYh
— The Sun (@TheSun) April 6, 2021
ناروے کی بحریہ فورس نے ریسکیو کرنے کے لیے ہیلی کاپٹر کا استعمال کیا اور ماہر تیراکوں کو رسی باندھ کر سمندر میں اتارا جنہوں نے ایک ایک کر کے 12 ملازمین کو ریسکیو کیا۔
انٹرنیٹ پر شیئر ہونے والی ویڈیو میں جہاز کو لہروں اور ہوا کے سامنے بے بس اور ڈوبتے جبکہ نیوی اہلکاروں کو عملے کو ریسکیو کرتے دیکھا جاسکتا ہے۔
رپورٹ کے مطابق اگر ریسکیو آپریشن شروع کرنے میں تھوڑی دیر ہوتی تو عملے کے اراکین کی جانیں ضائع ہوسکتی تھیں۔
