لندن: برطانوی شہزادے فلپ کی آخری رسومات کی تاریخ کا اعلان ہو گیا، شہزادہ فلپ کی آخری رسومات 17 اپریل کو ادا کی جائیں گی۔
تفصیلات کے مطابق بکنگھم پیلس نے کہا ہے کہ آنجہانی شہزادہ فلپ کی آخری رسومات ونڈزرکاسل میں سترہ اپریل کو ادا کی جائیں گی، جس میں امریکا سے شہزادہ ہیری بھی شرکت کریں گے۔
یاد رہے کہ برطانوی شہزادے فلپ کا انتقال جمعے کو 99 سال کی عمر میں ہوا تھا، ملکہ برطانیہ کے شوہر شہزادہ فلپ کچھ عرصے سے بیمار تھے، انھیں دل سمیت دیگر بیماریوں کی وجہ سے اسپتال میں داخل کرایا گیا تھا، اور وہ گزشتہ ماہ ہی اسپتال سے ڈسچارج ہوئے تھے۔
پرنس فلپ کی موت، ہیری کا آخری رسومات میں شرکت کے حوالے سے بڑا فیصلہ
گزشتہ دنوں ملکہ برطانیہ اور شہزادہ فلپ نے کرونا ویکسین کی پہلی ڈوز بھی لگوائی تھی۔
شہزادہ فلپ 10جون 1921 کو یونانی جزیرے کورفو میں پیدا ہوئے، شہزادہ فلپ اور ملکہ الزبتھ دوم کی شادی 1947 میں ہوئی تھی، شہزادہ فلپ اور ملکہ ایلزبتھ کے 4 بچے ہیں جن کے نام چارلس، اینی، اینڈریو اور ایڈورڈ ہے۔
برطانیہ کے ننانوے سالہ شہزادہ فلپ کو اپنی ذمہ داریوں سے 2017 ہی میں مکمل طور پر سبک دوش کر دیا گیا تھا جس کے بعد وہ عوام کے سامنے کبھی کبھار ہی آتے تھے۔ زندگی کے ننانوے سال گزارنے کے باوجود وہ بادشاہ نہ بن سکے، ان کے بیٹے شہزادہ چارلس بھی 72 برس کے ہو چکے ہیں، اور وہ بھی تاحال بادشاہ نہیں بنے۔
