کراچی: وفاقی وزیر داخلہ شیخ رشید نے امن و امان کی صورت حال پر ہنگامی اجلاس طلب کر لیا ہے۔
ذرائع کا کہنا ہے کہ وزیر داخلہ نے اہم اجلاس طلب کر لیا ہے، شیخ رشید کی زیر صدارت امن و امان سے متعلق یہ اجلاس رینجرز ہیڈ کوارٹر میں ہوگا ، وزیر داخلہ کراچی اور سندھ میں امن و امان سے متعلق اجلاس میں اہم فیصلے کریں گے۔
ذرائع کے مطابق وزیر داخلہ شیخ رشید کی وزیر اعلیٰ سندھ سے ملاقات کل صبح 10 بجے ہوگی، جس میں صوبے میں امن و امان اور وفاق سے جڑے امور کا جائزہ لیا جائے گا، وفاقی وزیر گورنر سندھ عمران اسماعیل سے بھی ون آن ون ملاقات دوپہر ایک بجے کریں گے۔
واضح رہے کہ وفاقی وزیر داخلہ شیخ رشید 2 روزہ دورے پر کراچی آئے ہیں، کراچی روانگی سے قبل اسلام آباد ایئر پورٹ پرگفتگو کرتے ہوئے انھوں نے کہا میں کراچی میں امن و امان کاجائزہ لوں گا، مشن صرف امن ہے، کراچی سے واپسی پر وزیر اعظم کو امن و امان کی رپورٹ پیش کروں گا، کراچی میں میری اہم ملاقاتیں ہیں، وزیر اعلیٰ سندھ مراد علی شاہ سے بھی ملاقات ہوگی۔
وزیر اعظم نے سندھ میں بڑھتے ہوئے جرائم پر نوٹس لے لیا، شیخ رشید کو خصوصی ہدایت
یاد رہے کہ سندھ میں امن و امان کی صورت حال پر نوٹس لیتے ہوئے گزشتہ روز وزیر اعظم نے وزیر داخلہ کو ہدایت کی تھی کہ وہ سندھ کا دورہ کریں اور قانون نافذ کرنے والے اداروں سے مل کر اس صورت حال پر حکمت عملی طے کریں۔
