ریاض: سعودی وزارت تجارت نے گاڑیوں کی خرید وفروخت کرنے والوں کے لیے اہم ہدایات جاری کردیں۔
عرب میڈیا کے مطابق سعودی وزیر تجارت ڈاکٹر ماجد القصبی نے گاڑیوں کے ڈیلرز کو ہدایت کی ہے کہ وہ اپنی سروس بہتر بنائیں، کوتاہی برتنے پر کوئی رعایت نہیں برتی جائے گی۔
وزیر تجارت نے کار ڈیلرز کے ساتھ کی گئی ملاقات میں صارفین کی جانب سے پیش کی گئی شکایات کے حوالے سے ڈیلرز کو مخاطب کرتے ہوئے کہا کہ ان کی وزارت سب کی کارکردگی پر 24 گھنٹے نظر رکھے ہوئے ہے۔
انہوں نے کہا کہ سب کی کارکردگی کا گراف سامنے ہے، گاڑیوں کے ڈیلرز اپنا رویہ درست کریں۔
ماجد القصبی نے کہا کہ جو کار ڈیلر صارفین کی پسند ناپسند کا خیال رکھیں گے اور مطلوبہ سہولتیں معیاری شکل میں فراہم کریں انہیں ترغیبات دی جائیں گی جبکہ کوتاہی برتنے والوں سے کوئی رعایت نہیں برتی جائے گی، وزارت کا سلوگن صارفین کی خوشنودی ہے۔
سعودی وزیر نے صارفین کی مختلف شکایات کا بھی جائزہ لیا جن میں اسیئرپارٹس کی عدم دستیابی، متبادل گاڑی کا فراہم نہ کیا جانا اور قیمتوں میں غیر معمولی اضافے کے نکات شامل تھے۔
وزیر تجارت نے گاڑیوں کی فروخت کے بعد سروس کے معیار کو بہتر بنانے پر زور دیتے ہوئے سروس سینٹرز کی تعداد میں اضافے کی ہدایت بھی کی۔
