کراچی: شہر قائد کے علاقے سچل مدینہ کالونی میں پولیس اہلکار کو قتل کرنے والا ڈاکو مبینہ پولیس مقابلے میں مارا گیا۔
اے آر وائی نیوز کے مطابق کراچی کے علاقے سچل مدینہ کالونی میں تین گھنٹے قبل پولیس اہلکار کے قتل کا واقعہ پیش آیا تھا، ایس ایس پی کا کہنا ہے کہ ملزمان موقع سے فرار ہوکر جھاڑیوں میں چھپ گئے تھے، فائرنگ کے تبادلے میں ایک افغانی ڈاکو مارا گیا جبکہ دو فرار ہوگئے۔
ایس ایس پی ساجد سدوزئی کا کہنا ہے کہ ہلاک ملزم سے شہید کانسٹیبل پر فائرنگ میں استعمال ہونے والا اسلحہ بھی برآمد کرلیا گیا ہے۔
پولیس کے مطابق ملزم کو شہید کانسٹیبل کے ساتھی اہلکار اور عوام نے شناخت کیا، ملزم کی لاش پوسٹ مارٹم کے لیے اسپتال منتقل کردی گئی ہے، برآمد اسلحے کا بھی فرانزک کرایا جائے گا۔
یہ پڑھیں: کراچی: ڈاکوؤں کی فائرنگ سے پولیس اہلکار شہید
ایس ایس پی کا کہنا تھا کہ دیگر ملزمان کی گرفتاری کے لیے آپریشن جاری ہے۔
واضح رہے کہ کچھ دیر قبل سپرہائی وے پر جمالی پل کے قریب ڈاکوؤں کی فائرنگ سے پولیس اہلکار شبیر احمد شہید ہوگئے تھے۔
یاد رہے کہ جمالی پل کے اطراف لوٹ مار کی وارداتیں معمول بن چکی ہیں چند روز قبل بھی ڈاکوؤں نے لوٹ مار کے دوران شہری کو گولی مار دی تھی۔
