ٹوکیو: جاپان نے کووڈ 19 وائرس سے متاثرہ مریضوں کے علاج کے لئے نئے اینٹی وائرل طریقہ کار کی منظوری دےدی ہے۔
غیر ملکی میڈیا رپورٹ کے مطابق جاپان نے گلیکسو اسمتھ کلائن اور ویر بائیو ٹیکنالوجی کی سوتر ویماب وی کو کرونا وائرس کے اینٹی باڈی علاج کے طور پر منظور کرلیا ہے، اسی کے ساتھ ہی سوتر ویماب وی جاپان میں کووڈ نائنٹین کے علاج کے لئے پانچویں منظور شدہ دوا بن گئی ہے۔
میڈیا رپورٹ کے مطابق اس بات کا اعلان جاپان کے وزیرصحت نوریہسا تمورا نے کیا، وزیر صحت کا کہنا تھا کہ سوتر ویماب وی کو کورونا وائرس کے اینٹی باڈی علاج کے طور پر منظور کیا گیا ہے، یہ ان مریضوں پر استعمال ہوگی جن میں کرونا کی ہلکی علامات ہونگی اور انہیں آکسیجن سپلیمنٹ کی ضرورت نہیں ہوگی۔
یہ بھی پڑھیں: کووڈ نائنٹین مریضوں کا علاج، یو اے ای نے تاریخ رقم کردی
واضح رہے کہ سوترو ویماب کو امریکی ایف ڈی اے اور متحدہ عرب امارات کی وزارت صحت و تدارک نے کووڈ 19 کے ہنگامی علاج کیلئے منظور کررکھا ہے ، اسے عالمی سطح پر علاج معالجہ کی مایہ ناز کمپنی جی ایس کے نے تیار کیا ہے ، اس کی وجہ سے کووڈ 19 کے باعث ہونے والی اموات میں 85 فیصد کمی دیکھنے میں آئی ہے اور مریضوں کے بہت جلد ہسپتال سے فارغ ہونے کا رحجان بھی دیکھا گیا۔
واضح رہے کہ سوترو ویماب یورپی یونین کی انسانی دواؤں سے متعلق کمیٹی سے توثیق حاصل کرچکی ہے، جس کے بعد اسے کینیڈا ، اٹلی ، سنگاپور ، متحدہ عرب امارات اور دیگر ممالک میں استعمال کرنے کی عارضی اجازت بھی دی جاچکی ہے۔
