کراچی : سندھ میں 12 ربیع الاول پرموٹرسائیکل کی ڈبل سواری پر پابندی عائد کردی گئی تاہم خواتین ،بچے،بزرگ،صحافی اور ضروری خدمات دینے والے پابندی سے مستثنیٰ ہوں گے۔
تفصیلات کے مطابق سندھ حکومت نے 12 ربیع الاول کے موقع پر موٹرسائیکل کی ڈبل سواری پر پابندی عائد کردی ، اس حوالے سے محکمہ داخلہ سندھ نے نوٹیفکیشن جاری کردیا ہے۔
نوٹی فکیشن میں کہا گیا ہے کہ 19 اکتوبر کوایک دن کے لیے ڈبل سواری پر پابندی رہے گی،تاہم خواتین ،بچے،بزرگ،صحافی اور ضروری خدمات دینے والے پابندی سے مستثنیٰ ہوں گے۔
دوسری جانب عیدمیلاد النبیﷺسے متعلق مرتضیٰ وہاب کی زیرصدارت اجلاس ہوا ، جس میں مرتضیٰ وہاب نے کہا کہ کراچی کی تاریخی عمارتوں کوہرے رنگ سےسجایا جائے گا اور جلوس میں داخل ہونیوالوں کیلئےواک تھروگیٹ لگائےجائیں گے۔
واضح رہے ماہ ربیع الاول امت مسلمہ کے لیے خاص اہمیت کا حامل ہے کیونکہ اس مہینے نبی آخرالزماں ﷺ کی دنیا میں آمد ہوئی، پیغمبر اکرم صلی اللہ علیہ وآلہ وسلم پوری دنیا کے لئے عملی نمونہ بن کر آئے اور وہ ہر شعبے میں اس اوج کمال پر فائز ہیں کہ ان جیسا کوئی تھا اور نہ ہی قیامت تک آسکتا ہے۔
