خادم حرمین شریفین شاہ سلمان بن عبدالعزیز کی صدارت میں کابینہ کا ورچوئل اجلاس منعقد ہوا۔ کابینہ نے اس عزم کا اعادہ کیا کہ سعودی عرب یمن کے امن و استحکام اور یمنی عوام کی ترقی و خوشحالی کے اقدامات کرتا رہے۔ یمنی بحران کے سیاسی حل تک رسائی کے مشن کی تائید و حمایت جاری رکھے گا۔
سعودی خبر رساں ادارے "ایس پی اے” کے مطابق قائم مقام وزیر اطلاعات ڈاکٹر ماجدالقصبی نے بتایا کہ کابینہ نے 2022 کے قومی بجٹ اور ملک میں امن و استحکام کی نعمت پر اظہار شکر کرتے ہوئے کہا کہ نئے بجٹ میں متعدد پروگرام اور منصوبے شامل کیے گئے ہیں جن سے افرادی قوت کو فروغ ملے گا۔
اقتصادی وسائل میں تنوع اور مالیاتی استحکام کا سلسلہ برقرار رہے گا، شہری اور مقیم غیرملکیوں کی صحت و سلامتی کے پروگرام جاری رکھے جائیں گے۔
سعودی وژن 2030 کے اہداف کی تکمیل کے لیے اقتصادی اصلاحات اور اقدامات کی پالیسی پر گامزن رہیں گے۔ کابینہ نے ولی عہد شہزادہ محمد بن سلمان کے خلیجی ممالک کے دورے اور نتائج پر مسرت کا اظہار کیا۔
کابینہ نے جی سی سی سربراہ کانفرنس کے انعقاد اور اس کے مثبت نتائج پر پسندیدگی کا اظہار کیا۔ کابینہ نے سعودی عرب اور مصر کے درمیان خطے سمیت دنیا بھر کے بحرانوں اور مسائل پر نکتہ ہائے نظر میں مطابقت پر اطمینان کا اظہار کیا، کابینہ میں علاقائی، خلیجی اور بین الاقوامی مسائل حاضرہ کا بھی جائزہ لیا گیا۔
کابینہ نے ایران کے حمایت یافتہ حوثی دہشتگردوں کی جارحانہ سرگرمیوں کو ناکام بنانے، شہریوں اور سول تنصیبات پر حملوں سے متعلق عرب اتحاد برائے یمن کے آپریشنز کے نتائج پر قدر و منزلت کا اظہار کیا۔
