اسلام آباد: فنڈز کی کمی اور دیگر مسائل کے باعث الیکشن کمیشن نے انتخابات میں مزید تاخیر کا عندیہ دے دیا۔
ترجمان الیکشن کمیشن کے مطابق چیف الیکشن کمشنر کی زیر صدارت اہم اجلاس ہوا، اجلاس میں چاروں صوبائی کمشنر سمیت اعلیٰ حکام نے شرکت کی، اجلاس میں انکشاف ہوا کہ آئینی وقانونی ذمہ داریوں میں مشکلات پیدا کی جارہی ہیں جس کے باعث اہم آئینی امور مجوزہ بالا انتخابات کے انعقاد کے لئےمتاثرہورہےہیں۔
الیکشن کمیشن کے مطابق عام انتخابات میں مطلوبہ فنڈز کی فراہمی کےلئے مسلسل مسائل کا سامنا ہے، بلدیاتی الیکشن پر سپریم کورٹ کےاحکامات کی بھی خلاف ورزی کی جاری ہے، سنگین معاملے پر رجسٹرار سپریم کورٹ کو بھی صورتحال سےآگاہ کرنےکا فیصلہ کیا گیا ہے۔
الیکشن کمیشن کے ترجمان نے بتایا کہ تمام اقدامات کے نتیجے میں پنجاب، بلوچستان،سندھ اور اسلام آباد کے بلدیاتی انتخابات میں مشکلات ہیں اور اس بات کا قوی امکان ہے کہ بلدیاتی الیکشن تاخیر کا شکار ہوجائیں۔
اجلاس میں سیکریٹری ای سی کو ہدایت کی گئی کہ سیکرٹری خزانہ، متعلقہ چیف سیکرٹریز سے بات کریں اور معاملات فوری حل کیےجائیں۔
