ریوڈی جینرو: یورپی یونین کی چارجنگ پورٹ سے متعلق قانون سازی پر برازیل نے بڑا قدم اٹھالیا۔
ٹیکنالوجی ویب سائٹ گیجٹس تھری سکٹی کے مطابق برازیل کی قومی مواصلاتی کمپنی نے ملک بھر میں فروخت ہونے والے اسمارٹ فون کے لیے ایک ہی چارجنگ کیبل رکھنے کی تجویز پیش کردی ہے۔
اس سلسلے میں نیشنل ٹیلی کمیونیکیشن ایجنسی ( اناٹیل) نے عوامی رائے بھی طلب کرلی ہے، اس ضمن میں اناٹیل نے رواں ہفتے ہی عوامی رائے شماری کا آغاز کیا ہے تاکہ برازیل میں اسمارٹ فون چارجرز کے لیے یکساں معیار رکھنے کی حکم کی تکیمل کی جاسکے۔
برازیل کی جانب سے یہ اقدام اس تناظر میں اٹھایا گیا جب یورپی یونین نے جون کے ابتدا میں ہی موبائل فونز، ٹیبلیٹس، ہیڈ فونز اورکیمروں کے لیے یکساں چارجنگ پورٹ رکھنے کے قانون کو حتمی شکل دی۔
یہ بھی پڑھیں: اینڈرائیڈ پر ٹائپ کیے بغیر واٹس ایپ میسجز کیسے بھیجیں؟
خاص بات یہ ہے کہ اناٹیل کی یہ نئی تجویز صرف اسمارٹ فونز کے لیے دی گئی ہے، اس قانون سازی سےامریکی ٹیکنالوجی جائنٹ ایپل کا آئی فون متاثر ہوگا کیوں کہ ایپل ابھی تک یو ایس بی ٹائپ سی کے بجائے پرائیریٹی پورٹ استعمال کررہی ہے۔
مگر برازیل کے آئی ٹی ماہرین کا کہنا ہے کہ اس اقدام کا مقصد ملک بھر میں کیبل چارجنگ انٹرفیس کویو ایس بی ٹائپ سی کے معیار سے ہم آہنگ کرنا ہے۔
یہ بات ذہن نشین رہے کہ آئی فون کے تمام ماڈلز لائٹننگ کیبل سے جب کہ اینڈرائیڈ ڈیوائسز چارجنگ کے لیے یو ایس بی ٹائپ سی کنیکٹرز استعمال کرتی ہیں۔
