کراچی: پشتون تحفظ موومنٹ کے رہنما اور رکن قومی اسمبلی علی وزیر کی ایک اور مقدمے میں ضمانت منظور ہوگئی۔
میڈیا رپورٹ کے مطابق کراچی سینٹرل جیل میں قائم انسداد دہشت گردی کی خصوصی عدالت نے رکن قومی اسمبلی علی وزیر کی درخواست ضمانت پر فیصلہ سنادیا ہے، عدالت نے علی وزیر کی درخواست ضمانت منظور کرتے ہوئے انہیں متعلقہ مقدمہ میں رہا کرنے کا حکم جاری کیا ہے۔
عدالت نے فیصلے میں ملزم کو 5 لاکھ روپے زر ضمانت جمع کرانے کا بھی حکم دیا ہے۔
یہ بھی پڑھیں: محسن داوڑ اورعلی وزیر کا ایجنڈا ایک بار پھر کھل کر سامنے آگیا
رکن قومی اسمبلی پر اشتعال انگیز تقاریر کے الزام میں دہشت گردی کی دفعات کے تحت چار مقدمات درج ہیں جن میں سے تین میں ان کی ضمانت منظور ہوچکی ہے جبکہ ایک مقدمہ میں تاحال ان کی ضمانت منظور نہیں ہوسکی ہے۔ اس سے قبل ایک مقدمے میں سپریم کورٹ اور ایک میں ہائیکورٹ ضمانت منظور کرچکی ہے۔
علی وزیر کے خلاف مقدمات شاہ لطیف اور سہراب گوٹھ کے تھانوں میں درج ہیں۔
