ماہر معاشیات اور سابق ترجمان وزارت خزانہ مزمل اسلم نے کہا ہے کہ آئی ایم ایف معاہدے پر نگراں حکومت بھی عملدرآمد کرالے گی۔
اے آر وائی نیوز کے مطابق ماہر معاشیات اور سابق ترجمان وزارت خزانہ مزمل اسلم نے ملک کی روز بروز بگڑی معاشی صورتحال پر تبصرہ کرتے ہوئے کہا ہے کہ 15 دنوں میں برآمدات کا بیڑہ غرق ہوگیا ہے، اب عوام بھول جائیں کہ ڈالر اب 225 روپے سے نیچے جائے گا۔
مزمل اسلم نے اپنے ایک بیان میں کہا کہ جب درآمدات کا بحران ختم ہوگیا ہے تو بینک میں ڈالر کیوں نہیں ہیں، ایک لاکھ کی ایل سی کیلئے 8 دن انتظار کرنے کا کہا جارہا ہے، بانڈ مارکیٹ ختم ہوچکی ہے اور اب حل صرف آئی ایم ایف کا راستہ باقی بچا ہے۔
ان کا کہنا تھا کہ آئی ایم ایف کی بھی کوئی ٹائم لائن نہیں کہ کب پیسے دینگے، آئی ایم ایف معاہدے پر نگراں حکومت بھی عملدرآمد بھی کرالے گی مگر ان پر اعتماد ختم ہو چکا ہے۔
مزمل اسلم نے اس سے قبل میڈیا سے گفتگو کرتے ہوئے کہا تھا کہ مالیاتی طور پر ہمارا بریک ڈاؤن ہوچکا ہے، اس وقت صورتحال بہت تشویشناک ہے۔
مالیاتی طور پر ہمارا بریک ڈاؤن ہوچکا ہے، مزمل اسلم
ماہر معاشیات کا کہنا تھا کہ بینکوں کے پاس سرمایہ نہیں ہے، معیشت کے لیے ڈالر آکسیجن کی حیثیت رکھتا ہے، ملک کی معیشت میں آکسیجن نہیں آرہی، کاربن ڈائی آکسائیڈ ہی آرہی ہے۔
