کراچی : نیشنل فلڈ رسپانس کو آرڈی نیشن سینٹر (این ایف آرسی سی) اور پاک بحریہ کی جانب سے متاثرین کی امداد اور بچاؤ کی کوششیں جاری ہیں، متاثرہ افراد کو خیمے اور کھانے پینے کی اشیا کی فراہم کی گئیں۔

اس حوالے سے ذرائع کا کہنا ہے کہ پاک بحریہ کے4فلڈ ریلیف سینٹرز،18 کلیکشن پوائنٹس متاثرین کی خدمت میں دن رات مصروف عمل ہیں۔

این ایف آرسی سی کے مطابق متاثرین میں اب تک1519ٹن راشن،4904خیمے،6لاکھ51ہزار627لیٹر منرل واٹر تقسیم کیا گیا ہے، پاک بحریہ کی9 خیمہ بستیوں میں16ہزار79افراد رہائش پذیرہیں۔

اس کے علاوہ 23ایمرجنسی رسپانس ٹیموں نے15ہزار231افراد کو بچا کر محفوظ مقامات پر منتقل کیا، ایمرجنسی ٹیمیں54موٹرائزڈ بوٹس،2ہوورکرافٹ سے لیس ہیں۔

نیشنل فلڈ رسپانس کے مطابق پاک بحریہ نے اندرون سندھ میں2ہیلی کاپٹر بھی تعینات کئے ہیں، اب تک6 پروازوں میں471پھنسے افراد کو ریسکیو کیا گیا۔ این ایف آرسی سی کا کہنا ہے کہ ہیلی کاپٹرز سےراشن کے4656پیکٹ متاثرین میں تقسیم کیے گئے،۔

8ڈائیونگ ٹیموں نے متاثرہ علاقوں میں27 آپریشنز بھی کئے اور 70میڈیکل کیمپس میں57ہزار64مریضوں کا علاج کیا گیا، ہرمریض کو 3سے5دن کی مفت ادویات فراہم کی گئیں۔