روس کا لڑاکا طیارہ یوکرین کے قریب رہائشی عمارت سے ٹکرا کر تباہ ہو گیا۔
خبر رساں ادارے رائٹرز کے مطابق علاقائی گورنر نے تصدیق کرتے ہوئے کہا ہے کہ روسی لڑاکا طیارہ پیر کو جنوبی روس کے شہر ییسک میں ایک رہائشی عمارت سے ٹکرا گیا جس کے نتیجے میں اپارٹمنٹس میں خوفناک آگ بھڑک اٹھی۔
میڈیا رپورٹس میں شیئر ہونے والی تصاویر میں ایک کثیر المنزلہ عمارت سے آگ کا بڑا گولہ پھٹتے دکھا جا سکتا ہے۔
روسی خبر رساں ایجنسیوں کا کہنا ہے کہ لڑاکا طیارے کے پائلٹ کریش سے پہلے باہر نکل چکے تھے۔
گورنر وینیامین کونڈراتیف کا کہنا ہے کہ طیارہ سخوئی ایس یو 34 تھا جو ایک سپرسونک درمیانے فاصلے تک مار کرنے والا لڑاکا بمبار طیارہ ہے۔
آر آئی اے نیوز ایجنسی کا کہنا ہے کہ طیارہ فوجی ہوائی اڈے سے تربیتی پرواز کے دوران گر کر تباہ ہوا اور حادثے کی وجہ انجن میں آتشزدگی کو قرار دیا جا رہا ہے۔
