انٹرنیشنل کرکٹ کونسل (آئی سی سی) ٹی 20 ورلڈ کپ کے سیمی فائنل میں کل پاکستان اور نیوزی لینڈ کی ٹیمیں ٹکرائیں گی، میچ پاکستانی وقت کے مطابق دوپہر ایک بجے شروع ہوگا۔
ورلڈ کپ کے سپر 12 مرحلے میں پاکستان نے بنگلہ دیش کو شکست دے کر سیمی فائنل میں رسائی حاصل کی تھی، شاہین آفریدی کو چار وکٹیں حاصل کرنے پر میچ کا بہترین کھلاڑی قرار دیا گیا تھا۔
قومی ٹیم کے کپتان بابر اعظم ورلڈ کپ میں آؤٹ آف فارم ہیں اور کوئی بڑی اننگز نہیں کھیل سکے ہیں۔
اے آر وائی نیوز کے پروگرام ’ہرلمحہ پرجوش‘ میں سابق کپتان یونس خان نے بتایا کہ بابر اعظم کہاں غلطی کررہے ہیں؟
سابق کپتان نے کہا کہ اس میں کوئی شک نہیں ہے کہ وہ ایک لیجنڈری کھلاڑی ہیں اگر ورلڈ کپ میں بھارت اور بنگلہ دیش کے خلاف ان کی بیٹنگ کی بات کی جائے تو وہ اسکوائر پر کھیلنے گئے ایج لگا آؤٹ ہوئے، اسی طرح دوسرے میچ میں بھی آف اسٹمپ پر کھیلنے گئے اور رن آؤٹ ہوگئے۔
انہوں نے کہا کہ جنوبی افریقہ کے خلاف میچ میں بھی ایسا ہی ہوا بابر اعظم آف اسٹمپ پر سلو بال کھیلنے گئے تو ڈپ مڈ وکٹ پر آؤٹ ہوگئے۔
سابق کپتان نے کہا کہ وہ اسکوائر لیگ، مڈ وکٹ، مڈ آن کی طرف اچھا کھیلتے ہیں لیکن آسٹریلیا کی پچز مختلف ہیں وہاں پر گیند باؤنس ہوکر آتا ہے کوچز یہی بتاتے ہیں کہ گیند کی لائن میں آکر کھیلیں اگر ایسا نہیں کرتے تو ایچ لگ کر کیچ آؤٹ ہوجاتے ہیں۔
یونس خان نے بتایا کہ بابر اعظم کو کل کیویز کے خلاف میچ میں گیند کی لائن میں آکر کھیلنا ہے جب وہ ٹاپ ہینڈ کے ساتھ کھیلیں گے تو شاٹ لگیں گے اور وہ رنز کرسکیں گے۔
