راولپنڈی: قومی ٹیم کے تجربہ کار بیٹسمین اظہر علی کو میڈیکل پینل نے فٹ قرار دے دیا۔
پی سی بی کے مطابق گزشتہ روز بیٹنگ کے دوران سیدھے ہاتھ کی انگلی پر گیند لگنے سے زخمی ہونے والے بلے باز اظہر علی کو میڈیکل پینل نے فٹ قرار دے دیا۔
پی سی بی کا کہنا ہے کہ اظہرعلی راولپنڈی ٹیسٹ کے آج آخری روز بیٹنگ کریں گے۔
یاد رہے کہ پاکستان کو انگلینڈ کے خلاف تاریخی ٹیسٹ میں اس وقت بڑا دھچکا لگا جب تجربہ کار بلے باز ہدف کے تعاقب میں گیند لگنے سے زخمی ہو گئے۔
عبداللہ شفیق کے آؤٹ ہونے پر اظہرعلی بیٹنگ کے لیے آئے تو فاسٹ بولر رابنسن کی دوسری گیند پر تیز باؤنسر کھیلتے ہوئے گیند ان کے ہاتھ پر جا لگی، فزیو کے ابتدائی معائنے کے بعد اظہرعلی کو میدان سے باہر جانے کا مشورہ دیا گیا اور یوں اظہرعلی ریٹائر ہرٹ ہوئے۔
اظہرعلی کی انجری پر اہم اپ ڈیٹ
واضح رہے کہ راولپنڈی ٹیسٹ دلچسپ مرحلے میں داخل ہو گیا ہے، کھیل کے آخری روز انگلینڈ کو جیت کے لیے 8 وکٹ درکا ہوں گی جب کہ پاکستان کو 263 رنز بنانے ہیں۔
