کراچی : شہر قائد میں کے ایک گھر کے اندر آگ لگنے سے 3 بچے جھلس کر جاں بحق ہوگئے، مرنے والے بچوں کی مسخ لاشیں نکال لی گئیں۔
تفصیلات کے مطابق کراچی کے علاقے قصبہ میانوالی کالونی کے ایک گھر میں آتشزدگی کا واقعہ پیش آیا ہے جس میں 3کمسن بچے جھلس کر جاں سے ہاتھ دھو بیٹھے۔
اطلاع ملتے ہی پولیس اور فائربریگیڈ کی گاڑیاں جائے وقوعہ پر پہنچ گئیں تاہم زیادہ دیر ہونے کے باعث گھر میں موجود بچوں کو نہ بچایا جاسکا، آگ لگنے کی اصل وجہ تاحال معلوم نہ ہوسکی۔
اس حوالے سے ریسکیو ذرائع کا کہنا ہے کہ تینوں بچوں کی جھلسی ہوئی لاشیں نکال لی گئیں جنہیں قانونی کارروائی کیلئے اسپتال منتقل کردیا گیا۔
ذرائع کے مطابق جاں بحق ہونے والے بچوں میں5سالہ عظمیٰ، 6سالہ اقصیٰ اور 7سالہ محمد شامل ہیں، فائر بریگیڈ حکام کا کہنا ہے کہ آگ لگنے کے باعث گھر مکمل طور پر جل کر خاکستر ہوگیا۔
اس حوالے سے علاقہ مکینوں کا کہنا ہے کہ گھر کے پاس نشے کے عادی افراد اکثر آگ جلاتے تھے، رات کے اوقات میں منشیات فروشوں کارندے بھی علاقے میں موجود ہوتے ہیں۔
ان کا کہنا ہے کہ مبینہ طور پر نشےکے عادی افراد کی لگائی گئی آگ گھر تک پھیلی، کچھ بچے آگ لگتے ہی گھر سے باہر نکل آئے اور 3بچے اندر ہی سوتے رہ گئے۔
