لاہور : مسلم لیگ (ضیاءالحق) کے سربراہ اعجازالحق نے کہا ہے کہ وفاقی حکومت کا مسئلہ صرف یہ ہے کہ پنجاب میں پی ٹی آئی کی حکومت کس طرح ختم کرنی ہے۔
ان خیالات کا اظہار انہوں نے زمان پارک لاہور میں چیئرمین پی ٹی آئی عمران خان سے ملاقات کے بعد میڈیا سے گفتگو کرتے ہوئے کیا۔
انہوں نے کہا کہ ملکی معیشت تباہی کے دہانے پر کھڑی ہے، آٹے اور بنیادی اشیاء سمیت ہرچیز کی قلت ہورہی ہے لیکن حکمرانوں نے صرف یہ مسئلہ بنایا ہوا ہے پنجاب حکومت کیسے ختم کرنی ہے؟
اعجازالحق نے کہا کہ جتنی جلدی الیکشن ہوں گے اتنی جلدی ان سے چھٹکارا ملے گا، ملکی معیشت کی تباہی موجودہ حکومت کی وجہ سے ہوئی ہے۔
وزیر خزانہ اسحاق ڈار کی جانب سے دیئے جانے والے کے حوالے سے ان کا کہنا تھا کہ لوگ اپنے بینکوں سے پیسے نکال رہے ہیں اور لاکرزخالی کرا رہے ہیں۔
ایسا وقت نہ آئے کہ ملک جمہوریت کی پٹری سے اترجائے لہٰذا حکومت جلد از جلد الیکشن کا اعلان کرے، انہوں نے بتایا کہ کافی دنوں کے بعد عمران خان سے ملاقات ہوئی ہے۔
