امریکا میں ایک دو سالہ بچی نے اپنی گردن کچن میں استعمال ہونے والے سانچے میں پھنسا لی جس کے بعد ماں کو 911 کو طلب کرنا پڑا۔
امریکی ریاست پنسلوینیا کی رہائشی خاتون ایرین میکسل کا کہنا ہے کہ وہ گھر سے دفتر کا کام کر رہی تھیں، اور ان کی 2 سالہ بچی بھی اسی کمرے میں کھیل رہی تھی جب اچانک اس نے ماں کو آواز دی۔
خاتون نے دیکھا کہ بچی نے کچن میں استعمال ہونے والا سانچے نما اینجل پین (برتن) اپنی گردن میں پھنسا لیا تھا۔
ماں کا کہنا ہے کہ بچی اسے ہیٹ کی طرح پہن کر کھیل رہی تھی۔ انہوں نے برتن کو نکالنے کی کوشش کی لیکن ناکام رہیں جس پر انہوں نے قریبی فائر اسٹیشن فون کیا۔
فائر اسٹیشن سے کوئی جواب موصول نہ ہونے پر خاتون نے مجبوراً 911 کال کی اور ہچکچاتے ہوئے کہا کہ کوئی ایمرجنسی صورتحال تو نہیں، تاہم اسے ان کی مدد کی ضرورت ہے۔
خاتون کی زبانی ساری صورتحال جاننے کے بعد 911 کے عملے نے علاقے کے فائر اسٹیشن فون کیا جس کا عملہ کچھ دیر بعد خاتون کے گھر پہنچا۔
اس دوران بچی کو کوئی تکلیف یا نقصان نہیں ہوا، وہ آرام سے کھا پی رہی تھی اور ٹی وی پر کارٹون دیکھ رہی تھی۔
فائر بریگیڈ کے عملے نے برتن کاٹ کر بچی کو آزاد کیا جس پر ماں نے ان کا بے حد شکریہ ادا کیا۔
