رمضان المبارک معمول کی زندگی سے ہٹ کر نہ صرف عبادت و اذکار میں گزارنے کا ذریعہ ہے بلکہ جسم و صحت کو بھی آرام دے کر انہیں ری چارج کرنے کا مہینہ ہے۔
ماہرین طب کا کہنا ہے کہ موٹاپا تمام بیماریوں کی جڑ ہے، موٹاپے سے ہائی بلڈ پریشر اور شوگر جیسے موذی امراض ہوتے ہیں تاہم اچھی بات یہ ہے کہ مسلمانوں کو ایک ایسا مہینہ میسر ہے جس میں وزن کو خاطر خواہ حد تک کم کیا جا سکتا ہے۔
سعودی ماہر غذائیت کا کہنا ہے کہ رمضان المبارک میں ہیبسکس نامی پودے کے پھولوں کو مختلف طریقوں سے استعمال کیا جاسکتا ہے، گرمی میں ہیبسکس کا شربت یا چائے لذت اور توانائی سے بھرپور مشروب ہیں۔
اس کی ایک اور خاص بات وزن میں کمی کرنا ہے اور ساتھ ساتھ جسم میں موجود مضر بیکٹیریا اور کینسر کے خلیات کی افزائش کو کم کرنا ہے۔
جدید تحقیق میں بھی ہیبسکس کی چائے پینے سے صحت پر متعدد فوائد کا انکشاف ہوا ہے۔
ہیبسکس پر کی گئی ریسرچ میں بھی یہ بات سامنے آئی ہے کہ تحقیقی مطالعے میں شامل 70 فیصد رضا کاروں کے وزن میں ہیبسکس کی چائے یا شربت پینے سے کمی واقع ہوئی۔
ان افراد میں محض 12 ہفتوں کے بعد جسمانی چربی پگھل گئی اور ان کا وزن کم ہوگیا۔
