مٹیاری: حیدرآباد سکھر موٹر وے (M-6) اسکینڈل میں ملوث سابق ڈی سیز کا نیا کرپشن اسکینڈل سامنے آ گیا ہے۔
تفصیلات کے مطابق آڈیٹر جنرل کی اسپیشل آڈٹ رپورٹ میں دو سابق ڈی سیز عدنان راشد اور تاشفین عالم کی مبینہ کرپشن کا انکشاف ہوا ہے۔
اسپیشل آڈٹ رپورٹ کی کاپی اے آر وائی نیوز نے حاصل کی، جس میں کہا گیا ہے کہ سابق ڈی سی مٹیاری عدنان راشد نے سیلاب متاثرین کے لیے آئی ساڑھے 4 کروڑ کی رقم ہتھیا لی ہے، جب کہسابق ڈپٹی کمشنر نوشہروفیروز تاشفین عالم نے بھی ساڑھے 3 کروڑ روپے نکلوائے۔
رپورت کے مطابق دونوں ڈپٹی کمشنرز نے اوپن چیک کے ذریعے کیش کی صورت میں رقم نکلوائی۔
سابق ڈپٹی کمشنر مٹیاری عدنان راشد موٹروے کرپشن اسکینڈل میں پہلے ہی گرفتار ہیں، جب کہ سابق ڈی سی نوشہروفیروز تاشفین عالم موٹر وے کرپشن اسکینڈل میں بیرون ملک فرار ہیں۔
واضح رہے کہ سندھ اور وفاقی حکومت نے سیلاب متاثرین کی امداد کے لیے ڈپٹی کمشنرز کو خطیر رقم فراہم کی تھی۔
