بھارت کو عالمی سطح پر ایک بار پھر ہزیمت کا سامنا کرنا پڑا ہے۔ قطر میں پکڑے گئے بھارتی بحریہ کے آٹھ سابق اہلکاروں پر جاسوسی کے مقدمے کا آغاز ہوگیا۔
میڈیا رپورٹس کے مطابق بھارتی بحریہ کے 8 سابق افسران پر اسرائیل کے لیے قطر کی جاسوسی کا الزام عائد کیا گیا ہے۔
بھارتی وزارت خارجہ کے ترجمان نے تصدیق کرتے ہوئے کہا کہ مقدمے کی پہلی سماعت انتیس مارچ کو ہوئی تھی اور آئندہ سماعت تین مئی کو ہے۔
بھارتی میڈیا کا کہنا ہے قطری حکام کا ماننا ہے کہ بھارتی سابق اہلکار آبدوز پروگرام کے بارے میں خفیہ معلومات ایک ملک کو ارسال کر رہے تھے۔
بھارتی بحریہ کے آٹھ سابق اہلکار قطر میں ایک دفاعی کمپنی میں ملازم تھے۔ یہ آٹھ افراد دہراء گلوبل ٹیکنالوجیز اینڈ کنسلٹنسی سروسز نامی کمپنی کے لیے کام کر رہے تھے جسے قطر کے دفاع اور دیگر ایجنسیوں کا "مقامی کاروباری شراکت دار” قرار دیا گیا تھا۔
انہیں اگست 2022 میں دوبارہ گرفتار کیا گیا تھا حالانکہ اس وقت کوئی سرکاری طور پر الزامات نہیں لگائے گئے تھے لیکن شبہ بڑھنے پر کہ وہ اسرائیل کی طرف سے جاسوسی کر رہے تھے ان پر الزامات عائد کیے گئے۔
