کراچی: صوبہ سندھ کے مختلف شہروں سے 500 کے قریب مفرور و اشتہاری ملزمان کو گرفتار کیا گیا، آئی جی سندھ کا کہنا ہے کہ ٹول پلازہ پر چہرہ شناخت کے لیے خصوصی کیمروں کی تنصیب کی جائے گی۔
تفصیلات کے مطابق انسپکٹر جنرل (آئی جی) سندھ غلام نبی میمن کی زیر صدارت اجلاس منعقد ہوا جس میں مفرور اور اشتہاری ملزمان کے ریکارڈ کا جائزہ لیا گیا۔
آئی جی کا کہنا تھا کہ تلاش ایپ کے بعد ٹول پلازہ پر ٹریول آئیز لگانے کا معاہدہ کیا جا رہا ہے، چہرہ شناخت کے لیے خصوصی کیمروں کی تنصیب کی جائے گی۔ ڈیٹا موجودگی سے قانون کی گرفت مضبوط ہوجائے گی۔
انہوں نے ہدایت کی کہ مفرور ملزمان کو اشتہاری ملزمان قرار دینے کے اقدامات کیے جائیں۔
ایڈیشنل آئی جی کراچی جاوید عالم اوڈھو نے اجلاس کو بریفنگ دیتے ہوئے کہا کہ جرائم پیشہ عناصر کے خلاف کریک ڈاؤن میں تیزی لائی گئی ہے، مجموعی طور پر 476 مفرور اور 44 اشتہاری ملزمان کو گرفتار کیا گیا۔
بریفنگ میں کہا گیا کہ ویسٹ زون میں 208 مفرور اور 20 اشتہاری ملزمان گرفتار ہوئے، ایسٹ زون سے 143 مفرور اور 9 اشتہاری اور ساؤتھ زون سے 125 مفرور اور 15 اشتہاری ملزمان کو گرفتار کیا گیا۔
اجلاس کو بتایا گیا کہ حیدر آباد سے 277 مفرور اور 70 اشتہاری، سکھر سے 158 مفرور اور 45 اشتہاری، لاڑکانہ سے 129 مفرور اور 129 اشتہاری اور میرپور خاص سے 56 مفرور اور 4 اشتہاری گرفتار کیے گئے۔
