کراچی : گورنر اسٹیٹ بینک جمیل احمد نے وزیر خزانہ اسحاق ڈار کے بیان پر لاعلمی ظاہر کرتے ہوئے کہا دوطرفہ قرضوں کی ری اسٹرکچرنگ کا معلوم نہیں۔
تفصیلات کے مطابق گورنر اسٹیٹ بینک جمیل احمد نے اسٹاک مارکیٹ کے تجزیہ کاروں کو بریفنگ دیتے ہوئے وزیرخزانہ کے بیان پر لاعلمی ظاہر کردیا اور کہا دوطرفہ قرضوں کی ری اسٹرکچرنگ کےبارےمیں معلومات نہیں، دو دن پہلے وزیرخزانہ اسحاق ڈار نے کہا تھا وہ دوطرفہ قرض کی پروفائلنگ پر کام کر رہے ہیں۔
گورنر اسٹیٹ بینک نے بتایا کہ زیادہ تر قرض ملٹی لیٹرل اور دوطرفہ ہیں، یورو بانڈز قرض وقت پر ادا کر دیں گے۔
جمیل احمد کا کہنا تھا کہ رواں ماہ تین اعشاریہ چھ ارب ڈالر کی رقم واجب الادا ہے، جس میں صفر اعشاریہ چار ارب ڈالر پہلے ہی ادا کرچکےہیں اور دو اعشاریہ تین ارب ڈالر رول اوور کرلیا جائے گا، جبکہ رواں ماہ صفراعشاریہ نو ارب ڈالر فنانسنگ کی ضرورت ہے۔
انھوں نے مزید بتایا کہ آئندہ مالی سال میں پاکستان کو تیئس ارب ڈالر قرض واپس کرنے ہوں گے، ان قرضوں کو چار سہ ماہی میں یکساں طور پر تقسیم کردیا جائے گا۔
آئی ایم ایف سے مذاکرات کے حوالے سے گورنراسٹیٹ بینک نے کہا کہ آئی ایم ایف سے بات چیت جاری ہے، امید ہے جائزہ جلد مکمل ہو جائے گا۔
