دنیا بھر میں تقریباً ہر عمر کے افراد کو سر کے درد کا عارضہ لاحق ہوتا ہے، ان میں مرد و خواتین اور بچے بھی شامل ہیں، سر درد مختلف افراد کو مختلف طریقوں سے پریشان کرتا ہے۔
اس حوالے سے اے آر وائی نیوز کے پروگرام باخبر سویرا میں نیورو سرجن پروفیسر ڈاکٹر رضا رضوی نے سر درد کی وجوہات سے ناظرین کو تفصیلاً آگاہ کرتے ہوئے اس کے علاج سے متعلق بھی اہم مشورے دیے۔
انہوں نے کہا کہ سردرد کی بہت سی وجوہات ہوتی ہیں اور اس کی سب سے بڑی وجہ جو آج کل بہت عام ہے وہ ٹینشن ہے، اس کے علاوہ کام کی زیادتی، تھکن اور میگرین بھی ہے جس کے باعث کمر کے پٹھوں میں کھچاؤ پیدا ہوجاتا ہے۔
پروفیسر ڈاکٹر رضا رضوی کا کہنا تھا کہ ثانوی سر کے درد کا تعلق دوسری طبی حالت سے ہوتا ہے، جیسے دماغ میں خون کی نالیوں کی بیماری، سر کی چوٹ، ہائی بلڈ پریشر، انفیکشن، ادویات کا زیادہ استعمال کرنا ہے۔
انہوں نے کہا کہ سر کے درد کے علاج کے لیے آپ کو سب سے اہم پہلوؤں اور درد کے محرکات کا پتہ لگانا ہوتا ہے یہ جاننا ضروری ہے کہ وہ کیا عوامل ہیں کہ جو سر کے درد کی وجہ بنتے ہیں۔
انہوں نے بتایا کہ اس کے لیے مریض کو اپنا لائف اسٹائل تبدیل کرنا چاہیے، اپنے سونے کے اوقات ، کھانے پینے اور کام کے اوقات میں بھی تبدیلی لائیں۔
