کراچی: شہر قائد کے تاجروں نے جماعت اسلامی کی ملک گیر ہڑتال کی حمایت کا اعلان کر دیا ہے۔
تفصیلات کے مطابق تاجر رہنماؤں نے رات گئے مشترکہ پریس کانفرنس میں جماعت اسلامی کی ملک گیر ہڑتال کی حمایت کا اعلان کیا، تنظیم تاجران و انجمن تاجران پاکستان نے کہا ’’ہم جماعت اسلامی کی ہڑتال کی مکمل حمایت کرتے ہیں۔‘‘
تاجر رہنماؤں کا کہنا تھا کہ بجلی اور پٹرول کے نرخوں میں اضافہ واپس نہ لیا گیا تو ملک بھر میں مظاہرے کریے گے، انھوں نے اپیل کی کہ تاجر بجلی بلز، بھاری ٹیکسز، پٹرول کی قیمت میں اضافے، کے الیکٹرک کی لوٹ مار اور بدامنی کے خلاف اور کاروبار بند رکھیں۔
دوسری طرف شہر میں ہڑتال کے باعث سڑکوں پر ٹریفک کم دیکھا گیا، مہنگائی کے خلاف عوام مختلف علاقوں میں احتجاج بھی کر رہے ہیں، کراچی کے علاقے بلدیہ ٹاؤن کے مختلف علاقوں میں احتجاج کیا گیا اور سڑکیں بلاک کی گئیں۔
بجلی کے اضافی بل، مہنگائی کیخلاف ملک بھر میں شٹر ڈاؤن ہڑتال
ادھر پشاور میں بجلی، گیس اور پٹرولیم مصنوعات کی قیمتوں میں اضافے کے خلاف شٹر ڈاؤن ہڑتال کیا جا رہا ہے، بار ایسوسی ایشن نے بھی آج مہنگائی کے خلاف احتجاج کی کال دے دی ہے، وکلا آج 11 بجے مہنگائی کے خلاف احتجاجی مظاہرہ کریں گے۔
خیبر پختون خوا کے شہر سوات میں بھی بجلی بلوں میں اضافے اور مہنگائی کے خلاف ہڑتال ہے، اور تعلیمی ادارے بھی بند ہیں، وکلا نے بھی عدالتی کارروائی کا مکمل بائیکاٹ کر رکھا ہے۔
