بھارتی فلم انڈسٹری کے معروف اداکار شاہ رخ خان کو دھمکی آمیز پیغامات موصول ہونا شروع ہوگئے، جس کے باعث ان کی سیکورٹی میں مزید اضافہ کردیا گیا ہے۔
بھارتی میڈیا کا اس حوالے سے کہنا ہے کہ شاہ رخ خان نے رواں سال دو سپر ہٹ فلمیں دی ہیں جن میں فلم ‘پٹھان’ اور‘جوان’ شامل ہیں، ‘جوان’ ریلیز کے ایک ماہ بعد بھی باکس آفس پر چھائی ہوئی ہے، ان کامیابیوں کے دوران شاہ رخ خان کی سیکورٹی میں مزید اضافہ کردیا گیا ہے۔
دھمکی آمیز پیغامات موصول ہونے کے بعد شاہ رخ خان کومہاراشٹر حکومت نے Y+ سیکیورٹی فراہم کی ہے، مہاراشٹر کے وی آئی پی سیکیورٹی یونٹ کے کمانڈوز کی ٹیم بالی ووڈ سپر اسٹار کے ساتھ ہر وقت رہے گی۔
بھارتی میڈیا کا کہنا ہے کہ ان کی سیکیورٹی میں ایک تربیت یافتہ کمانڈو کے ساتھ ٹریفک کلیئرنس گاڑی شامل ہوگی جو ٹریفک کو کلیئر کرے گا تاکہ کوئی بھی اداکار کی گاڑی کے آگے یا پیچھے نہ آئے۔
میڈیا رپورٹ کے مطابق ممبئی میں شاہ رخ خان کے ’منت‘ گھر کی سیکیورٹی بھی بڑھا دی گئی، ممبئی پولیس کے 4 اہلکار 24 گھنٹے اداکار کے گھر کی حفاظت کریں گے
یاد رہے کہ کنگ خان کے لئے یہ سال ان کے کیرئیر کا بہترین سال رہا، فلم ’پٹھان‘ نے پوری دنیا میں کامیابی سے بزنس کیا اور مجموعی طور پر 1050 کروڑ کا بزنس کیا جبکہ ایٹلی۔‘جوان’اب تک دنیا بھر میں 1090 کروڑ کا بزنس کرچکی ہے۔
