عامر خان ویسے تو بلا کے اداکار ہیں ہی مگر اب وہ گلوکاری میں بھی مہارت حاصل کرنے کے لیے باقاعدہ اس کی تعلیم حاصل کررہے ہیں۔
بالی وڈ پر تین دہائیوں سے راج کرنے والے عامر خان ان دنوں کلاسیکی موسیقی سیکھنے میں مصروف ہیں۔ بھارتی میڈیا رپورٹس کے مطابق مسٹر پرفیکشنسٹ کی عرفیت سے مشہور اداکار روزانہ کی بنیاد پر موسیقی کی ایک گھنٹے مشق کررہے ہیں۔
اس سے قبل عامر خان مراٹھی زبان بھی سیکھ چکے ہیں جبکہ مراٹھی اسپیکنگ میڈیا اور فوٹوگرافرز سے وہ مراٹھی میں بھی بات کرتے نظر آئے ہیں۔
ذرائع نے انکشاف کیا کہ کلاسیکل موسیقی میں مہارت حاصل کرنے کے لیے عامر خان نے موسیقی کے استاد کی خدمات بھی حاصل کر رکھی ہیں اور وہ روزانہ ریاض بھی کرتے ہیں۔
عامر خان ہمیشہ ہی کچھ نہ کچھ سیکھنے کی جستجو میں رہتے ہیں وہ کئی برسوں سے متعدد مشغلے اپنا چکے ہیں اور وہ اپنی صلاحیتوں کو بڑھانے کیلئے کوشاں رہتے ہیں۔
جنوری کی تین تاریخ کو عامر خان کی بیٹی ایرا کی شادی ہے، عامر خان اس سلسلے میں بھی مصروف ہیں۔ اداکار حال ہی میں اپنی بیمار ماں کی دیکھ بھال کے لیے چنئی بھی گئے تھے۔
