کراچی:ایران سے آپریٹ ہونے والے 2 بھتہ خوروں کو پولیس اور رینجرز نے مشترکہ کارروائی میں لیاری اور گارڈن کے علاقے سے گرفتار کر لیا۔
ترجمان رینجرز کے مطابق کراچی کے علاقوں گارڈن اور لیاری میں محکمہ پولیس اور رینجرز نے مل کر کارروائی کی، جس میں لیاری گینگز کے نام پر بھتہ لینے والے 2 ملزمان کو گرفتار کر لیا گیا۔
گرفتار ملزم عدنان اور انیس کو ایران سے آپریٹ کیے جانے کا انکشاف ہوا ہے، ملزمان نے آئرن مارکیٹ کے 5 تاجروں کو واٹس ایپ کال کی تھی، اور فون پر خود کو لیاری گینگ وار کمانڈر احمد علی مگسی ظاہر کیا۔
ترجمان کے مطابق ملزمان نے تاجر سے 2 لاکھ روپے بھتہ طلب کیا تھا، یہ ملزمان ایک سال سے عظیم کے ساتھ بھتہ خوری کا نیٹ ورک چلا رہے تھے، عظیم انتہائی مطلوب گینگ وار کمانڈر سلیم چاکلیٹی کا بھتیجا ہے۔
ملزمان نے 10 لاکھ سے زائد رقم حوالہ ہنڈی کے ذریعے ایران بھیجی، یہ رقم لیاری سلیم چاکلیٹی کے بھتیجے عظیم کو بھجوائی جاتی تھی۔
