رجیم چینج میں سعودی عرب کے کردار سے متعلق شیر افضل مروت کے بیان پر پی ٹی آئی رہنما زلفی بخاری کا اہم بیان سامنے آگیا۔
پاکستان تحریک انصاف کے رہنما زلفی بخاری نے شیر افضل مروت کے سعودی عرب سے متعلق بیان پر ردعمل دیا ہے۔ انھوں نے کہا کہ سعودی عرب کے بارے میں نہ تو عمران خان اور نہ ہی پی ٹی آئی ایسی کوئی رائے رکھتی ہے۔
زلفی بخاری کا کہنا تھا کہ سعودی عرب ہمیشہ سے ہمارا قریبی برادر ملک رہا ہے اور رہے گا، سعودی عرب کبھی بھی کسی بھی صورتحال یا حالات میں ہماری مدد کرنے میں ناکام نہیں ہوا۔
انھوں نے کہا کہ یہاں تک کہ سعودی وفد کا حالیہ دورہ بھی اس کا ثبوت ہے۔ ہمارے پاس سعودی عرب کی طرف سے کسی قسم کی مداخلت پر یقین کرنے کی کوئی وجہ نہیں ہے۔
رہنما تحریک انصاف زلفی بخاری نے کہا کہ ہمیں فخر ہے اور شاہی خاندان کے ساتھ اپنے تعلقات کو اولین ترجیح سمجھتے ہیں۔
