ڈھاکا: بنگلادیش کی سابق وزیر اعظم شیخ حسینہ کے صاحب زادے سجیب واجد نے ان خبروں کی تردید کی ہے جن میں یہ دعویٰ کیا گیا تھا کہ حسینہ واجد نے امریکا پر بنگلادیش میں حکومت کی تبدیلی کی سازش کا الزام لگایا۔
کل حسینہ واجد نے امریکا پر اپنی حکومت کو ختم کرنے کا الزام لگایا، آج بیٹے نے تردید کر دی ہے، سجیب واجد نے سوشل میڈیا پر لکھا میری والدہ نے امریکا پر عوامی لیگ کی حکومت ختم کرنے کا کوئی الزام نہیں لگایا۔
ایکس پر ایک پوسٹ میں سجیب واجد نے ایسی رپورٹس کو ’’مکمل طور پر غلط اور من گھڑت‘‘ قرار دیا، انھوں نے لکھا کہ ایک اخبار میں شائع ہونے والا میری والدہ سے منسوب حالیہ استعفیٰ کا بیان مکمل طور پر جھوٹا اور من گھڑت ہے۔
انھوں نے کہا ’’میں نے والدہ کے ساتھ صرف اس بات کی تصدیق کی ہے کہ انھوں نے ڈھاکا چھوڑنے سے پہلے یا بعد میں کوئی بیان نہیں دیا۔‘‘ سجیب واجد نے لکھا میری والدہ نے ڈھاکا چھوڑنے سے پہلے یا بعد میں کوئی بیان ہی نہیں دیا۔
حسینہ واجد کا بیٹا والدہ کی زندگی بچانے پر مودی حکومت کے گُن گانے لگا
واضح رہے کہ حسینہ واجد نے امریکی سازش میں پناہ ڈھونڈتے ہوئے الزام لگایا تھا کہ سینٹ مارٹن جزیرے پر ایئربیس بنانے کی اجازت نہ دینا ان کی حکومت کے خاتمے کا سبب بنا۔ بنگلادیش کی سیکولر حسینہ واجد نے یہ بھی کہا تھا کہ سینٹ مارٹن جزیرے اور برما کے علاقے کو ملاکر نئے عیسائی ملک بنانے کی سازش کی جا رہی ہے۔
بھارتی میڈیا یہ چرچا ہوتا رہا کہ سینٹ مارٹن آئی لینڈ پر امریکی ایئر بیس بنانے کی اجازت نہ دینا حسینہ اجد کے اقتدار کے خاتمے کا سبب بنا ہے۔
