کراچی: وفاق نے صوبہ سندھ میں 2022 کے سیلاب سے متاثرہ علاقوں میں مکانات اور اسکولوں کی تعمیر کے فنڈز میں اضافہ کر دیا۔
تفصیلات کے مطابق وفاق نے سندھ میں سیلاب سے متاثرہ مکانات کی تعمیر کے لیے رقم 25 ارب سے بڑھا کر 30 ارب کر دی ہے، اور متاثرہ اسکولوں کی تعمیر کے لیے رقم 2 ارب سے بڑھا کر 5 ارب روپے کر دی۔
رقم وفاقی حکومت کی جانب سے جاری پی ایس ڈی پی میں بڑھائی گئی ہے، گزشتہ مالی سال میں سیلاب سے متاثرہ مکانات کی تعمیر کے لیے 25 ارب روپے اور اسکولوں کی تعمیر کے لیے 2 ارب روپے مختص کیے تھے۔
دوسری طرف وفاق اور سندھ میں ترقیاتی فنڈز کے اجرا پر تنازع پر وزارت خزانہ نے سندھ حکومت کو ایک خط لکھ کر کہا ہے کہ صوبہ سندھ سب سے زیادہ ترقیاتی بجٹ ملنے کے باوجود شکوہ کر رہا ہے، رواں مالی سال اب تک سب سے زیادہ فنڈز سندھ کو 5 ارب 58 کروڑ روپے دیے گئے ہیں۔
ذرائع وزارت خزانہ کے مطابق خط میں کہا گیا ہے کہ تمام صوبوں کو 9 ارب 97 کروڑ روپے کے ترقیاتی فنڈز جاری کیے گئے ہیں، سب سے کم ترقیاتی بجٹ خیبر پختونخوا کو صرف 39 کروڑ جاری کیے گئے، جب کہ بلوچستان کو 3 ارب سے زائد، پنجاب کو 90 کروڑ روپے کے ترقیاتی فنڈز دیے گئے۔
وزیر اعلیٰ سندھ نے ترقیاتی بجٹ ریلیز نہ کرنے پر وزیر اعظم شہباز شریف کو خط لکھا تھا، جس پر وزیر اعظم نے وزارت خزانہ و منصوبہ بندی کو ترقیاتی بجٹ کے لیے ہدایات دی تھیں۔
