لاہور : پنجاب بھر میں پیٹرول کا بحران شدت اختیار کرگیا ہے۔ ملک کے دیگر حصوں سے پیٹرول کی قلت کی اب تک کوئی شکایت سامنے نہیں آئی۔
تفصیلات کے مطابق لاہورسمیت پنجاب میں پٹرول کا بحران شدت اختیارکرگیا ہے جبکہ ملک کے باقی صوبوں سے پٹرول کی قلت کی کوئی شکایت سامنے نہیں آئی ۔
پیٹرول کی قلت کا سارادباؤ پنجاب پر ہی پڑرہا ہے۔ ملک کے سب سے بڑے اور صنعتی شہر کراچی میں پیٹرول کی سب سے زیادہ کھپت ہونے کے باوجود یہاں پیٹرول کی سپلائی برقرار ہے۔
جبکہ طویل فاصلوں کے باعث خیبر پختونخوا اور گلگت بلتستان میں پیٹرول کی قلت ہونے کا امکان تھا ، لیکن وہاں سے بھی اب تک ایسی کوئی اطلاع موصول نہیں ہوئی۔
بحران کی شدت کم کرنے کےلیے گذشتہ روز لاہور ریجن میں سی این جی اسٹیشنز کھولنے کی حکومتی ہدایت پر چند اسٹیشنز کھولے گئے جس سے صورتحال میں بہتری نہ لائی جا سکی آئل فراہم کرنے والی کمپنیاں بیس دن کیلئے پیٹرول کا کوٹہ رکھنے کی پابند ہیں ۔
سوال یہ ہے کہ ایسا کیوں نہ ہو سکا ۔ سوال تو یہ بھی ہے کہ کیامحض چند افسران کی معطلی کا فی ہے ۔کیا اس سنگین بحران پر وزیر پیٹرولیم شاہد خاقان عباسی پر بھی کوئی ذمہ داری عائد ہوتی ہے یا نہیں، کیا وہ استعفی دیں گے۔
