اسلام آباد: حکومت نے اداروں کی نجکاری کے لیے مذاکراتی کمیٹی تشکیل دینے کا فیصلہ کرلیا۔
اے آر وائی نیوز کے مطابق وفاقی وزیر علیم خان کی زیر صدارت پرائیوٹائزیشن کمیشن بورڈ کا اجلاس ہوا جس میں زرعی ترقیاتی بینک سمیت مزید اداروں کی نجکاری پر غور، سمیت اہم امور پر گفتگو کی گئی۔
وفاقی وزیر نے کہا کہ اداروں کی نجکاری میں کامیابی کے مقصد کو یقینی بنایا جائے۔
علیم خان نے کہا کہ نجکاری میں تمام قانونی ضابطوں پر عملدرآمد کو یقینی بنایا جائے، علاوہ ازیں پرائیوٹائزیشن کمیشن بورڈ کے اراکین نے مختلف فیصلوں کی منظوری دی۔
واضح رہے کہ اس سے قبل خبریں آئی تھیں کہ وفاقی حکومت نے مزید کئی اداروں کی نجکاری کا پلان تیار کر لیا۔
ذرائع کے مطابق وفاقی حکومت نے رائٹ سائزنگ اقدامات کے تحت متعدداداروں کی نجکاری کیلئے نشاندہی کی ہے، وزیراعظم نے وزارت نجکاری اور صنعت و پیداوار کو ٹاسک دیدیا۔
ذرائع کا بتانا ہے کہ وزارت صنعت و پیداوار کے ادارے پاکستان اسٹون ڈیولپمنٹ کمپنی کی نجکاری کی تجویز دی گئی ہے، پاکستان آٹو موبیل کارپوریشن کی نجکاری کرنے کی نشاندہی کر لی گئی ہے۔
ذرائع کا کہنا تھا کہ نجکاری کی فہرست میں پاکستان انسٹیٹیوٹ آف مینجمنٹ، کھادی کرافٹس ڈیولپمنٹ کمپنی، لیدر کرافٹس ڈیولپمنٹ کمپنی اور مورافیکو انڈسٹریز شامل ہیں۔
حکومت کا سدرن پنجاب ایمبر وائڈری انڈسٹری، گوجرانوالہ بزنس سینٹر، پاکستان کیمیکل اینڈ انرجی سیکٹر اسکلز ڈیولپمنٹ کمپنی اور اسپن یارن ریسرچ اینڈ ڈیولپمنٹ کمپنی کی بھی نجکاری کا پلان ہے۔
ذرائع کا مزید کہنا تھا کہ وفاقی حکومت کی پہلی ترجیح ان اداروں کی نجکاری، دوسرا آپشن ختم کرنا ہے۔
