سرائےعالمگیر: پی ٹی آئی احتجاج کو روکنے کے لیے جگہ جگہ رکاوٹیں کھڑی ہونے کے سبب جہلم پل کے قریب ایک مریض ایمبولینس میں ہی دم توڑ گیا۔
تفصیلات کے مطابق سرائے عالمگیر سے ایک مریض کو ایمرجنسی کی حالت میں ڈی ایچ کیو اسپتال جہلم منتقل کیا جا رہا تھا، لیکن مبینہ طور پر ایمبولینس کو جہلم پل سے گزرنے کی اجازت نہیں دی گئی۔
ذرائع کا کہنا ہے کہ راستہ بند ہونے کی وجہ سے مریض کو اسپتال بروقت نہ پہنچایا جا سکا، جس کی وجہ سے وہ ایمبولینس ہی میں جاں بحق ہو گیا، اس کے بعد متوفی کے لواحقین کو میت کو بھی اٹھا کر پیدل ہی روانہ ہونا پڑا، جس کی فوٹیج منظرعام پر آ گئی ہے۔
اطلاعات کے مطابق دریائے جہلم کے دونوں پل کنٹینرز لگا کر بند کر دیے گئے ہیں اور پولیس کی بھاری نفری تعینات کی گئی ہے، موٹر وے ایم 2 کو لِلہ انٹر چینج سے کنٹینرز لگا کر بند کیا گیا ہے، پنڈدادن خان جہلم روڈ کو مصری موڑ کے مقام پر بند کیا گیا ہے۔ شاہراہیں بند ہونے سے شہریوں کو شدید مشکلات پیش آ رہی ہیں جب کہ ضلع بھر کی شاہراہوں پر پولیس کی اضافی نفری تعینات ہے۔
احتجاج اور دھرنا، پی ٹی آئی نے تمام حکومتی تجاویز مسترد کر دیں
واضح رہے کہ تحریک انصاف کے احتجاج سے قبل اسلام آباد اور راولپنڈی جانے والے راستے بند کر دیے گئے ہیں، ہاسٹل، گیسٹ ہاؤس اور ہوٹل خالی کرا لیے گئے، موٹر وے پر گاڑیوں کے لیے نو انٹری کے بورڈ لگا دیے گئے، اور جڑواں شہروں میں 33 مقامات پر بندشیں کھڑی کی گئی ہیں، جگہ جگہ کنٹینر کھڑے کیے گئے ہیں۔
