اسلام آباد ہائیکورٹ کے جج جسٹس محسن اختر کیانی کی عدالت میں زیر سماعت مقدمے کے لاپتہ شہری کا پتہ چل گیا۔
اے آر وائی نیوز کے مطابق رواں سال مارچ میں مظفر آباد سے مدثر خان لاپتہ ہوا تھا، جس کا مقدمہ اسلام آباد ہائیکورٹ میں زیر سماعت تھا۔ مذکورہ لاپتہ شخص کا پتہ چل گیا ہے اور وزارت دفاع نے اس حوالے سے عدالت میں رپورٹ جمع کرا دی ہے۔
اسلام آباد ہائی کورٹ کے جسٹس محسن اختر کیانی نے آج کیس کی سماعت کی۔
درخواست گزار ناظمہ فتح یاب کی جانب سے وکیل ایمان زینب حاضر مزاری و دیگر عدالت پیش ہوئے۔ اسسٹنٹ اٹارنی جنرل اور وزارت دفاع سے بریگیڈیئر فلک ناز بھی عدالت پیش ہوئے۔
رپورٹ وزارتِ دفاع کے مطابق مدثر حسین انڈر ٹرائل ملزم ہے اور ان پر فوجی عدالت میں کیس چل رہا ہے۔ وکیل درخواست گزار نے مدثر خان کے ساتھ فیملی کی ملاقات کی استدعا کی۔عدالت نے وزارت دفاع کے نمائندے کو مدثر خان کی فیملی سے قانون کے مطابق ملاقات کی ہدایت کی۔
عدالت نے مدثر خان کی فیملی سے ملاقات کی ہدایت کرتے ہوئے سماعت ملتوی کر دی۔
