پولیس نے سانحہ ماچھکہ کے بعد کچے میں ڈاکوؤں کے خلاف بڑے آپریشن شروع کردی جس میں 15 ڈاکو ہلاک ہوگئے۔
تفصیلات کے مطابق سانحہ ماچھکہ کے بعد صادق آباد میں پولیس کے ٹارگٹڈ آپریشن میں 15 ڈاکو ہلاک ہوگئے، ہلاک ہونے والوں میں ڈاکوؤں کا سرغنہ بھی شامل ہےجس کے سر کی قیمت ایک کروڑ تھی۔
ڈی پی او رضوان گوندل کے مطابق آپریشن میں بلٹ پروف موبائل، وینز، بکتر بند گاڑیوں اور کشتیوں کا استعمال کیا گیا، کچے میں پولیس فورس کے دستوں نے دوبارہ پوزیشنز سنبھال لی ہیں۔
دریائے سندھ کے کنارے پنجاب اور سندھ کی سرحد پر تین پولیس کیمپ قائم کیے گئے ہیں، ماچھکہ میں دریائی بچاؤ بند پر مزید 8 پولیس چوکیاں قائم کی گئی ہیں۔
واضح رہے کہ پنجاب کے شہر رحیم یار خان کے کچے کے علاقے ماچھکہ میں ڈاکوؤں نے پولیس کی 2 گاڑیوں پر راکٹوں سے حملہ کیا تھا، جس کے نتیجے میں 14 پولیس اہلکار شہید اور 8 زخمی ہوگئے تھے۔
