سندھ حکومت نے صوبے میں سیاحت اور ثقافت کے فروغ کے لیے کراچی سے تھرپارکر تک تھر ڈیزرٹ ٹرین سفاری شروع کرنے کا اعلان کیا ہے۔
اے آر وائی نیوز کے مطابق صوبائی وزیر ثقافت وسیاحت ذوالفقار علی شاہ کی زیر صدارت اجلاس ہوا جس میں کراچی سے تعلق رکھنے والے ٹوورز آپریٹرز نے شرکت کی۔
اس اجلاس میں سندھ کی ثقافت اجاگر کرنے اور سیاحت کے فروغ کے لیے کراچی سے تھرپارکر تک تھر ڈیزرٹ ٹرین سفاری شروع کرنے کا اعلان کرتے ہوئے صوبائی وزیر ذوالفقار علی شاہ نے کہا کہ فروری کے دوسرے ہفتے سے کراچی سے کھوکھراپار تک تھر ڈیزرٹ ٹرین سفاری کا آغاز ہوگا۔
انہوں نے کہا کہ اس ڈیزرٹ ٹرین کے مسافر کراچی، حیدرآباد، میرپورخاص، چھور اور کھوکھراپار تک سندھ کے ثقافت کے رنگ اور جاذب نظر سیاحتی مقامات دیکھیں گے۔
انہوں نے بتایا کہ تھرپارکر میں جلد جیپ ریلی بھی منعقد کرنے جا رہے ہیں جب کہ لاڑکانہ میں دو روزہ لاہوتی فیسٹیول 15 فروری سے شروع ہوگا۔
