اسلام آباد: ممبئی حملہ کیس میں ملزم ذکی الرحمان لکھوی کی دوبارہ نظر بندی کے احکامات جاری کر دیئے گئے ہیں ۔
ممبئی حملہ کیس میں ملزم ذکی الرحمان لکھوی کی ایک ماہ کیلئے نظر بندی کے احکامات محکمہ داخلہ پنجاب نے جاری کئے۔ اس سے قبل اسلام آباد ہائیکورٹ نے ذکی الرحمان لکھوی کو رہا کرنے کے احکامات جاری کیے تھے جو سپرنٹنڈنٹ اڈیالہ جیل کو بھجوا دیئے گئے تھے۔
توقع کی جارہی تھی کہ احکامات موصول ہونے کے بعد ذکی الرحمان لکھوی کو رہا کر دیا جائیگا تاہم محکمہ داخلہ پنجاب نے دوبارہ نظربندی کےاحکامات جاری کر دیئے۔
ملزم کی ممبئی حملہ کیس میں پہلے ہی ضمانت ہوچکی ہے، جس کی منسوخی کیلئے وفاقی حکومت نے انسدادِ دہشتگردی کی عدالت میں درخواست دائرکر رکھی ہے۔
دوسری جانب بھارت نے ذکی الرحمن لکھوی کی رہائی پر بہت واویلا کیا ہے اور دہلی میں پاکستانی ہائی کمشنر کو دفتر خارجہ طلب کر کے لکھوی کو رہا نہ کرنے کا مطالبہ کیا ہے۔
