اسلام آباد: قومی اسمبلی کی قائمہ کمیٹی برائے آئی ٹی کے اجلاس میں الیکٹرونک کرائم بل کی منظوری دیدی۔
اسلام آباد میں قومی اسمبلی کی قائمہ کمیٹی برائے آئی ٹی کا اجلاس کیپٹن ریٹائرڈ صفدر کی زیرِ صدارت ہوا، اجلاس کے دوران کمیٹی نے الیکٹرونک کرائم بل کی منظوری دیدی۔
بل کے متن کے مطابق حساس نظام میں مداخلت پر سات سال قید اور ایک کروڑ کا جرمانہ ہوگا، نفرت انگیز مواد پر پاچ سال قید ایک کروڑ جرمانہ ہوگا، سائبر دہشتگردی پر چودہ سال قید پانچ کروڑ جرمانہ عائد کیا جائے گا۔
الیکٹرونک فراڈ پر دو سال قید اور ایک کروڑ جرمانہ عائد ہوگا، غیر قانونی سم کی فروخت پرتین سال قید اور پانچ لاکھ جرمانہ عائد کیا جائے گا۔
غیر اخلاقی تصویر پر کسی کا چہرہ لگانے پرتین سال قید اور دس لاکھ روپے جرمانہ دینا پڑے گا، معلومات تک غیر قانونی رسائی پر تین سال قید اور پانچ لاکھ روپے جرمانہ ہوگا۔
غیر قانونی طور پرڈیٹا کاپی کرنے پر چھ ماہ قید اور ایک لاکھ جرمانہ کی سزائیں تجویز کی گئی ہیں۔
