واشنگٹن : دہشت گردی سے متعلق امریکی محکمہ خارجہ کی سالانہ رپورٹ کے مطابق دوہزارچودہ میں پاکستان میں دہشت گردی کی وارداتوں میں کمی آئی ہے۔ اس کے برعکس دنیا کے دیگر ممالک میں مجموعی طور پر دہشت گرد واقعات میں ایک تہائی اضافہ ہوا۔
امریکی محکمہ خارجہ کی سالانہ رپورٹ جاری کردی گئی، رپورٹ کے مطابق دوہزارچودہ میں پاکستان میں دہشت گردی کے واقعات میں کمی ہوئی جبکہ دنیا بھرمیں دہشتگردی واقعات میں ایک تہائی اضافہ ہوا، دوہزار تیرہ کے مقابلے میں اسی فیصد زائد ہلاکتیں ہوئیں۔
رپورٹ کے مطابق دوہزارچودہ میں دنیا کے پچانوے ممالک میں تیرہ ہزارچار سوتریسٹھ دہشت گرد حملوں میں تینتیس ہزارافراد جان سے ہاتھ دھوبیٹھے، گذشتہ سال سب سے بڑا واقعہ موصل میں جیل پر داعش کے حملے میں چھ سو ستر قیدیوں کی ہلاکت اور آرمی اسکول پشاور پر حملے میں ڈیڑھ سو بچوں کی شہادت تھا۔
محکمہ خارجہ کا کہنا ہے کہ پاکستان کے علاوہ جن ملکوں میں دہشت گردی واقعات میں کمی ہوئی، ان میں فلپائن،نیپال اورروس شامل ہیں۔
دنیا بھرمیں دہشت گردی میں اضافے کی وجہ عراق اورشام میں داعش، افغانستان میں طالبان اورنائجیریا میں بوکوحرام کی کارروائیاں ہیں۔
