کراچی میں نامعلوم افراد کی فائرنگ سے جاں بحق ہونے والے مولانا عبدالقیوم صوفی کے قتل کا مقدمہ درج کرلیا گیا، نماز جنازہ کے موقع پر مفتی منیب الرحمان نے حکومت سے قاتلوں کو گرفتار کرنے کا مطالبہ کیا۔
تفصیلات کے مطابق آج صبح گلستان جوہر میں فائرنگ سے جاں بحق ہونے والے مولانا صوفی عبدالقیوم کی نماز جنازہ مفتی منیب الرحمان کی امامت میں ادا کی گئی، تدفین کے بعد مفتی منیب نے گفتگو کرتے ہوئے کہا کہ واقعے کے ذمہ داروں کو ہمارے سامنے لایا جائے۔
انہوں نے کہا کہ مولانا عبدالقیوم صوفی کا قتل دہشت گردی اورٹارگٹ کلنگ کی واردات ہے، وزیر اعلیٰ سندھ ، ڈی جی رینجرز اور آئی جی سندھ واقعے کی شفاف تحقیقات کرائیں۔
مفتی منیب کا کہنا تھا کہ کل علماء اہلسنت کا مسجد عائشہ میں تعزیتی اجتماع ہوگا، ہم انتظامیہ کی جانب سے فوری اقدام کے منتظر ہیں، انہوں نے پرزور مطالبہ کیا کہ اس کیس سے متعلق تمام ثبوت ہمارے سامنے لائے جائیں۔
ان کا مزید کہنا تھا کہ اس کیس کی تفتیش میرٹ پر کرکے ذمہ داروں کو سامنے لایا جائے، قتل کی اس واردات میں قبضہ مافیا کے لوگ بھی ممکنہ طور پر ملوث ہوسکتے ہیں۔
مولانا عبدالقیوم صوفی کے قتل کا مقدمہ گلستان جوہرتھانے میں درج کرلیا گیا ہے، مذکورہ مقدمہ مقتول کے بھائی محمد آصف کی مدعیت میں مقدمہ درج کیا گیا
واضح رہے کہ آج صبح کراچی کے علاقے گلستان جوہر بلاک 9 میں مقامی مسجد کے مہتمم مولانا عبدالقیوم صوفی کو نامعلوم موٹر سائیکل سوار ملزمان نے فائرنگ کرکے قتل کردیا گیا۔
پولیس کا کہنا ہے کہ مولانا عبدالقیوم صوفی پاکستان علماء ایسوسی ایشن کے رکن تھے، مقتول جامع مسجد محمدیہ نورانی اسلامک سینٹرگلستان جوہرکے مہتمم بھی تھے۔
