کراچی: درخشاں تھانے میں ملزم معیز کی ہلاکت کے کیس میں تفتیشی پولیس سابق ایس پی نیئرالحق کو تلاش کرنے میں ناکام ہوگئی۔
تفصیلات کے مطابق تفتیشی پولیس کی جانب سے ملزم معیز کی ہلاکت کے کیس پر ایف آئی اے سے رابطہ کرلیا گیا ہے۔ نیئرالحق کا نام اسٹاپ لسٹ میں ڈالنے کیلئے درخواست دے دی گئی ہے۔ نیئرالحق کے بیرون ملک جانے کے شواہد نہیں ملے۔
ایف آئی اے ذرائع نے بتایا کہ نیئرالحق کا نام پروویژنل لسٹ میں بھی ڈالا گیا ہے، نیئرالحق کی آخری ٹریول ہسٹری جنوری کی ہے جب وہ کراچی واپس آئے۔
ذرائع کا اس حوالے سے مزید کہنا تھا کہ نیئرالحق کے گھر اور فلیٹ کے باہر تفتیشی پولیس نے نوٹسز بھی لگا دیے ہیں۔
واضح رہے کہ ایڈیشنل آئی جی کراچی نے ڈی آئی جی ویسٹ عرفان علی بلوچ کو درخشاں پولیس کی حراست میں معیز نامی ملزم کی موت کے واقعے کی تحقیقات کا حکم دیا تھا۔
اے آئی جی کراچی عمران یعقوب نے ہدایت کی تھی کہ معاملے کے اصل حقائق سامنے لائے جائیں۔ اے آئی جی نے کہا تھا کہ انکوائری افسر کراچی رینج کے کسی بھی دوسرے افسر سے مدد حاصل کر سکتا ہے۔
معاملے کی جامع انکوائری کر کے 3 روز میں رپورٹ پیش کرنے کی ہدایت کی گئی تھی، جس کی روشنی میں مزید محکمانہ کارروائی عمل میں لائی جائے گی۔
مجسٹریٹ نے ملزم کی گرفتاری اور مبینہ تشدد سے متعلق تفصیلات حاصل کر لی ہیں، اور زیر حراست ایس ایچ او، ہیڈ محرر اور ڈیوٹی افسر سے بیانات لیے۔
مجسٹریٹ کی جانب سے معطل ہونے والے ایس پی نیئر کے محافظوں اور اسکواڈ اہلکاروں سے بھی پوچھ گچھ کی گئی تھی۔
