سکھر : تیزاب گردی کا شکار ہونے والے 17 سالہ نوجوان عامر مگسی کا قاتل اس کا قریبی رشتے دار اور پڑوسی نکلا۔
اس حوالے سے مقتول نوجوان کے والد نے پولیس کو بتایا کہ دوستی نہ رکھنے پر نوجوان پر تیزاب پھینکا گیا، تھانہ سی سیکشن میں عامر مگسی کے والد محمد امین کی مدعیت میں مقدمہ درج کرلیا گیا ہے۔ پولیس کے مطابق ملوث ملزم کو جلد گرفتار کرلیا جائے گا۔
سی سیکشن تھانے کی حدود میں فریکل کالونی کے رہائشی 17 سالہ نوجوان عامر مگسی کو 18 دسمبر کی رات کو تیزاب گردی کا نشانہ بنایا گیا تھا عامر مگسی کو تشویشناک حالت میں سول اسپتال سکھر سے گمبٹ اسپتال منتقل کیا گیا جہاں وہ دوران علاج جاں بحق ہوگیا۔
مقتول نوجوان کے والد کے مطابق ان کے قریبی رشتے دار اور پڑوسی محمد حاجی مگسی نے دوستی نہ رکھنے پر میرے 17 سالہ بیٹے عامر پر تیزاب پھینکا جس کی وجہ سے عامر کا جسم جھلس گیا اور وہ جان کی بازی ہار گیا۔