سکھر: پنو عاقل میں دو ماہ قبل اپنے سابق شوہر اور سسرال والوں کے ہاتھوں قتل ہونے والی خاتون اور اس کی بیٹی کو جرگے نے انصاف دے دیا۔
اس حوالے سے ملنے والی اطلاعات کے مطابق سکھر کے علاقے پنوعاقل میں تیزاب گردی میں جاں بحق ہونے والی خاتون اور بیٹی کے خون بہا کیلئے جرگہ کا انعقاد کیا گیا۔
مذکورہ جرگے کے اکابرین نے قتل میں ملوث ملزمان کے خلاف فیصلہ کرتے ہوئے مقتولہ ماں اور بیٹی کے خون کی رقم1کروڑ20لاکھ مقرر کردی۔
ذرائع کے مطابق خاتون کے قتل پر80لاکھ روپے جبکہ 8سالہ بیٹی کے خون کی رقم40لاکھ روپے طے کی گئی ہے، ملزم نے موقع پر ہی10لاکھ روپے ادا کردیئے۔
یاد رہے کہ دو ماہ قبل خاتون اور اس کی8سالہ بیٹی پر تیزاب پھینکا گیا تھا، ملزم نے باپ اور بھائیوں کے ساتھ مل کر پہلی بیوی اور بیٹی پرتیزاب پھینکا، ذرائع کا کہنا ہے کہ خاتون نے پہلے شوہر نثار سے اولاد کیلئے جائیداد سے حصہ مانگا تھا۔
