دھیمے لہجے مگر رعب دار شخصیت کے مالک شفیع محمد شاہ کو ورسٹائل فن کار مانا جاتا ہے۔ انھوں نے پاکستان ٹیلی وژن کے ڈراموں میں اپنی لاجواب اداکاری سے ناظرین کو اپنا مداح بنایا۔ شفیع محمد شاہ نے اردو اور سندھی فلموں میں بھی کام کیا، لیکن ان کی وجہِ شہرت چھوٹی اسکرین پر نبھائے گئے کردار ہیں۔
اداکار شفیع محمد شاہ 17 نومبر 2007ء میں انتقال کرگئے تھے۔ آج ان کی برسی منائی جارہی ہے۔ شفیع محمد شاہ نے کئی یادگار ڈراموں میں اداکاری کی۔ ان کا تعلق سندھ کے شہر کنڈریارو سے تھا۔ اداکار شفیع محمد شاہ 1948ء میں پیدا ہوئے۔ سندھ یونیورسٹی سے بین الاقوامی تعلقات کے مضمون میں ایم اے کیا اور ایک زرعی بینک میں ملازمت اختیار کر لی۔ اداکاری ان کا شوق تھا اور اس کے لیے انھوں نے سب سے پہلے ریڈیو کا رخ کیا۔ شفیع محمد شاہ کا دھیما لہجہ اور مٹھاس ان کی آواز میں ایک جاذبیت اور کشش پیدا کرتی تھی جسے ریڈیو پر بہت پسند کیا گیا۔ انھوں نے فن کی دنیا میں بطور صدا کار اپنی صلاحیتوں کا اظہار کیا اور پھر فلم میں کام حاصل کرنے کے لیے لاہور چلے گئے۔
بطور اداکار کام حاصل کرنے کے لیے شفیع محمد شاہ نے ملازمت چھوڑ دی تھی۔ لاہور میں انھیں اپنے وقت کے مقبول ہیرو محمد علی نے فلم کورا کاغذ میں ایک کردار دلوا دیا۔ اسی زمانے میں ٹیلی وژن کے نہایت قابل اور باکمال پروڈیوسر شہزاد خلیل نے انھیں ایک ڈرامہ اڑتا آسمان میں کردار کی پیش کش کی۔ شفیع شاہ نے یہ آفر قبول کی اور یوں ٹی وی کے ناظرین سے ان کا تعارف ہوا۔ اداکار شفیع محمد شاہ لاہور میں قیام کے دوران چند ہی فلموں میں کام کرسکے اور کراچی لوٹ آئے۔
پاکستان ٹیلی وژن کے مقبول ترین ڈرامہ تیسرا کنارہ اور آنچ میں شفیع محمد شاہ کی لاجواب اداکاری ناظرین کو آج بھی یاد ہے۔ ان ڈراموں کی انھیں ملک بھر میں شہرت اور پذیرائی ملی۔ ڈرامہ سیریل آنچ میں ان کا کردار نہایت جان دار تھا۔ شفیع محمد شاہ نے اس ڈرامے میں محمود علی، شگفتہ اعجاز، سمیع ثانی، کلثوم سلطانہ جیسے سینئر اور منجھے ہوئے فن کاروں کے درمیان اپنی اداکاری سے خوب داد سمیٹی۔ یہ ایک معاشرتی کہانی تھی جس میں طلاق، دوسری شادی اور ازدواجی زندگی کے اتار چڑھاؤ اور میاں بیوی کے درمیان غلط فہمیوں اور رویوں کی عکاسی کرتے ہوئے مثبت پیغام دیا گیا تھا۔ شفیع شاہ اس ڈرامے کے بعد ہر دل عزیز فن کار بن گئے۔
اداکار شفیع شاہ نے ٹیلی وژن پر چاند گرہن، جنگل، دائرے، تپش، کالا پل، ماروی جیسے ڈراموں میں بھی لاجواب اداکاری کی۔
شفیع محمد شاہ نے سیاست کی دنیا میں بھی قدم رکھا۔ انھوں نے پاکستان پیپلز پارٹی پارلیمنٹیرینز کے ٹکٹ پر قومی اسمبلی کی نشست پر انتخاب لڑا تھا، لیکن کام یاب نہیں ہوسکے تھے۔ یہ 2002ء کی بات ہے۔
حکومتِ پاکستان نے اداکار شفیع محمد شاہ کو صدارتی تمغا برائے حسنِ کارکردگی اور بعد از مرگ ستارۂ امتیاز دیا۔
